ਧੜੱਲੇਦਾਰ ਬਿਊਰੋ ਲੋਕ ਸਭਾ ਵਿੱਚ ਮੋਦੀ ਦੇ ਤੀਖੇ ਤੀਰ, ਕਾਂਗਰਸ ‘ਤੇ ‘ਵੰਦੇ ਮਾਤਰਮ’ ਨੂੰ ਨਜ਼ਰਅੰਦਾਜ਼ ਕਰਨ ਦੇ ਦੋਸ਼ ਨਵੀਂ ਦਿੱਲੀ, 8 ਦਸੰਬਰ 2025 : ਲੋਕ ਸਭਾ ਵਿੱਚ 'ਵੰਦੇ ਮਾਤਰਮ' ਦੇ 150 ਸਾਲ ਪੂਰੇ ਹੋਣ ‘ਤੇ ਹੋਈ ਖਾਸ ਚਰਚਾ ਦੌਰਾਨ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਕਾਂਗਰਸ ਅਤੇ ਜਵਾਹਰ ਲਾਲ ਨਹਿਰੂ ‘ਤੇ ਸਿੱਧੇ ਸਵਾਲ ਉਠਾਏ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਤੁਸ਼ਟੀਕਰਨ ਦੀ ਰਾਜਨੀਤੀ ਕਰਕੇ ਇਸ ਗੀਤ ਨੂੰ ਕਦੇ ਉਹ ਸਥਾਨ ਨਹੀਂ ਮਿਲਿਆ ਜਿਸਦਾ ਇਹ ਹੱਕਦਾਰ ਸੀ। ਮੋਦੀ ਨੇ ਦਾਅਵਾ ਕੀਤਾ ਕਿ ਕਾਂਗਰਸ ਨੇ ਮੁਸਲਿਮ ਲੀਗ ਦੇ ਦਬਾਅ ਵਿੱਚ ਆ ਕੇ ਗੀਤ ਦੇ ਹਿੱਸੇ ਵੱਖਰੇ ਕੀਤੇ, ਜਿਸ ਨਾਲ ਭਾਰਤੀ ਆਜ਼ਾਦੀ ਸੰਘਰਸ਼ ਦੀ ਭਾਵਨਾ ਨੂੰ ਚੋਟ ਪਹੁੰਚੀ। ਉਨ੍ਹਾਂ ਇਹ ਵੀ ਜੋੜਿਆ ਕਿ ਉਹ ਸਮਾਂ ਕਾਂਗਰਸ ਦੀ ਕਮਜ਼ੋਰ ਪੋਲਿਸੀ ਅਤੇ ਵੰਡ ਦੇ ਡਰ ਨੂੰ ਦਰਸਾਉਂਦਾ ਹੈ। ਪੀਐਮ ਨੇ ਆਪਣੇ ਸੰਬੋਧਨ ਵਿੱਚ ਕਈ ਇਤਿਹਾਸਕ ਉਦਾਹਰਣ ਵੀ ਦਿੱਤੀਆਂ, ਜਿਵੇਂ 1936 ਵਿੱਚ ਜਿਨਾਹ ਵੱਲੋਂ ਕੀਤੀ ਗਈ ਅਪਤੀ ਅਤੇ ਉਸ ਤੋਂ ਬਾਅਦ ਨਹਿਰੂ ਵੱਲੋਂ ਗੀਤ ਦੀ ਜਾਂਚ ਸ਼ੁਰੂ ਕਰਵਾਉਣ ਦਾ ਫ਼ੈਸਲਾ। ਉਨ੍ਹਾਂ ਕਿਹਾ ਕਿ ਵੰਦੇ ਮਾਤਰਮ ਨੇ ਕ੍ਰਾਂਤੀਕਾਰੀਆਂ ਨੂੰ ਜੋਸ਼ ਦਿੱਤਾ ਸੀ ਅਤੇ ਇਹ ਸਿਰਫ਼ ਇਕ ਗੀਤ ਨਹੀਂ, ਸੰਗਰਾਮ ਦਾ ਨਾਅਰਾ ਸੀ। ਮੋਦੀ ਨੇ ਸਦਨ ਨੂੰ ਯਾਦ ਦਵਾਇਆ ਕਿ ਐਮਰਜੰਸੀ ਵਰਗੇ ਦੌਰਾਂ ਨੇ ਵੀ ਇਸਦੀ ਮਹੱਤਤਾ ਨੂੰ ਦਬਾਇਆ। ਅੰਤ ਵਿੱਚ, ਉਨ੍ਹਾਂ ਜ਼ੋਰ ਦਿੱਤਾ ਕਿ ਹੁਣ ਸਮਾਂ ਹੈ ਕਿ ਇਸ ਗੀਤ ਨੂੰ ਉਸਦੀ ਅਸਲ ਇੱਜ਼ਤ ਵਾਪਸ ਦਿੱਤੀ ਜਾਵੇ ਅਤੇ ਨੌਜਵਾਨ ਪੀੜ੍ਹੀ ਨੂੰ ਇਸਦਾ ਸਹੀ ਇਤਿਹਾਸ ਦੱਸਿਆ ਜਾਵੇ।