ਗੁਰੂਗ੍ਰਾਮ ਵਿੱਚ ਔਰਤ ਬਾਈਕਰ ਸ਼ਿਵਾਨੀ ਚੌਹਾਨ ਉਰਫ਼ ‘ਸੀਆ’ ਦੀ ਬਾਈਕ ਨੂੰ ਤੇਜ਼ ਰਫ਼ਤਾਰ ਕਾਰ ਨਾਲ ਟੱਕਰ ਮਾਰਨ ਦੇ ਮਾਮਲੇ ਵਿੱਚ ਪੁਲੀਸ ਨੇ ਮੁਲਜ਼ਮ ਕਾਰ ਚਾਲਕ ਕਲਿਆਣ ਬੈਂਸਲਾ ਨੂੰ ਮੰਗਲਵਾਰ ਨੂੰ ਰਾਜਸਥਾਨ ਦੇ ਰਾਜਗੜ੍ਹ ਤੋਂ ਗ੍ਰਿਫ਼ਤਾਰ ਕਰ ਲਿਆ ਹੈ। ਇਹ ਗ੍ਰਿਫ਼ਤਾਰੀ ਘਟਨਾ ਤੋਂ ਦੋ ਦਿਨ ਬਾਅਦ ਹੋਈ ਹੈ। ਮਾਮਲੇ ਵਿੱਚ ਪਹਿਲਾਂ ਗੁਰੂਗ੍ਰਾਮ ਦੇ ਸੈਕਟਰ-56 ਥਾਣੇ ਵਿੱਚ ਬੀਐੱਨਐੱਸ ਦੀ ਧਾਰਾ 281 ਅਤੇ 125 ਤਹਿਤ ਐੱਫਆਈਆਰ ਦਰਜ ਕੀਤੀ ਗਈ ਸੀ। ਸੀਆ ਵੱਲੋਂ ਸੋਸ਼ਲ ਮੀਡੀਆ ’ਤੇ ਵੀਡੀਓ ਜਾਰੀ ਕਰਕੇ ਗੰਭੀਰ ਦੋਸ਼ ਲਗਾਏ ਜਾਣ ਤੋਂ ਬਾਅਦ ਪੁਲੀਸ ਨੇ ਬੀਐੱਨਐੱਸ ਦੀ ਧਾਰਾ 109, ਯਾਨੀ ਇਰਾਦਾ-ਏ-ਕਤਲ, ਵੀ ਜੋੜ ਦਿੱਤੀ ਹੈ। ਵਾਇਰਲ ਵੀਡੀਓ ਵਿੱਚ ਦਿਖਾਈ ਦੇ ਰਿਹਾ ਹੈ ਕਿ ਕਾਰ ਚਾਲਕ ਪਹਿਲਾਂ ਸੀਆ ਨੂੰ ਰੁਕਣ ਦਾ ਇਸ਼ਾਰਾ ਕਰਦਾ ਹੈ ਅਤੇ ਫਿਰ ਕਾਰ ਨੂੰ ਉਸ ਦੀ ਸਪੋਰਟਸ ਬਾਈਕ ਵੱਲ ਮੋੜ ਕੇ ਟੱਕਰ ਮਾਰ ਦਿੰਦਾ ਹੈ। ਟੱਕਰ ਤੋਂ ਬਾਅਦ ਸੀਆ ਸੜਕ ’ਤੇ ਡਿੱਗ ਜਾਂਦੀ ਹੈ, ਜਦਕਿ ਕਾਰ ਚਾਲਕ ਮੌਕੇ ਤੋਂ ਚਲਾ ਜਾਂਦਾ ਹੈ। ਸੀਆ ਨੇ ਦੋਸ਼ ਲਾਇਆ ਕਿ ਉਸ ਨੂੰ ਔਰਤ ਬਾਈਕਰ ਹੋਣ ਕਾਰਨ ਨਿਸ਼ਾਨਾ ਬਣਾਇਆ ਗਿਆ ਅਤੇ ਕਾਰ ਸਵਾਰਾਂ ਨੇ ਉਸ ਨਾਲ ਬਦਸਲੂਕੀ ਵੀ ਕੀਤੀ। ਉਸ ਦਾ ਕਹਿਣਾ ਹੈ ਕਿ ਜੇਕਰ ਹਾਦਸਾ ਸਿਰਫ਼ ਗਲਤੀ ਨਾਲ ਹੋਇਆ ਸੀ ਤਾਂ ਮੁਲਜ਼ਮ ਮੌਕੇ ’ਤੇ ਰੁਕ ਕੇ ਉਸ ਦੀ ਹਾਲਤ ਕਿਉਂ ਨਹੀਂ ਦੇਖੀ। ਦੂਜੇ ਪਾਸੇ ਬੈਂਸਲਾ ਨੇ ਜਾਣਬੁਝ ਕੇ ਟੱਕਰ ਮਾਰਨ ਤੋਂ ਇਨਕਾਰ ਕੀਤਾ ਹੈ। ਉਸ ਨੇ ਕਿਹਾ ਕਿ ਯੂ-ਟਰਨ ਨੇੜੇ ਕਾਰ ਤੋਂ ਉਸ ਦਾ ਕੰਟਰੋਲ ਵਿਗੜ ਗਿਆ ਅਤੇ ਟੱਕਰ ਹੋ ਗਈ। ਉਸ ਨੇ ਇਹ ਵੀ ਦਾਅਵਾ ਕੀਤਾ ਕਿ ਉਹ ਬਾਈਕਰਾਂ ਦੇ ਸਮੂਹ ਵੱਲੋਂ ਕੁੱਟਮਾਰ ਦੇ ਡਰ ਕਾਰਨ ਮੌਕੇ ਤੋਂ ਚਲਾ ਗਿਆ ਸੀ। ਗੁਰੂਗ੍ਰਾਮ ਪੁਲੀਸ ਮੁਤਾਬਕ ਮੁਲਜ਼ਮ ਦੀ ਪਛਾਣ ਪਹਿਲਾਂ ਹੀ ਕਰ ਲਈ ਗਈ ਸੀ ਅਤੇ ਉਸ ਨੂੰ ਗ੍ਰਿਫ਼ਤਾਰ ਕਰਨ ਲਈ ਤਿੰਨ ਵਿਸ਼ੇਸ਼ ਟੀਮਾਂ ਬਣਾਈਆਂ ਗਈਆਂ ਸਨ।

Gurugram Shivani Chauhan Sia Biker Kalyan Bainsla Biker Accident Gurugram Police Rajasthan Rajgarh Road Accident Woman Biker Bns Section 109 Viral Video Crime News Haryana News News Feed National News