August 15, 2025
Rajni / Patiala
ਧੜੱਲੇਦਾਰ ਬਿਊਰੋ
ਅਕਾਦਮਿਕ ਖੇਤਰ ਵਿੱਚ ਪੰਜਾਬੀ ਯੂਨੀਵਰਸਿਟੀ ਨੂੰ ਵੱਡੀ ਕਾਮਯਾਬੀ
ਪਟਿਆਲਾ, 15 ਅਗਸਤ 2025 :
ਪੰਜਾਬੀ ਯੂਨੀਵਰਸਿਟੀ ਲਈ ਆਜ਼ਾਦੀ ਦਿਵਸ ਦੀ ਸਵੇਰ ਇੱਕ ਖੁਸ਼ੀ ਭਰੀ ਖ਼ਬਰ ਲੈ ਕੇ ਆਈ, ਜਦੋਂ ਇਹ 'ਆਊਟਲੁੱਕ-ਆਈ.ਸੀ.ਏ.ਆਰ.ਈ. ਰੈਂਕਿੰਗ 2025' ਵਿੱਚ ਦੇਸ਼ ਦੀਆਂ 75 ਸਰਵੋਤਮ ਰਾਜ ਯੂਨੀਵਰਸਿਟੀਆਂ ਵਿੱਚ ਸ਼ੁਮਾਰ ਹੋ ਗਈ। ਇਸ ਰੈਂਕਿੰਗ ਵਿੱਚ ਪੰਜਾਬੀ ਯੂਨੀਵਰਸਿਟੀ ਨੇ 47ਵਾਂ ਸਥਾਨ ਹਾਸਿਲ ਕਰਦਿਆਂ ਟੌਪ 50 ਵਿਚ ਆਪਣੀ ਥਾਂ ਬਣਾਈ।
ਉਪ-ਕੁਲਪਤੀ ਡਾ. ਜਗਦੀਪ ਸਿੰਘ ਨੇ ਇਸ ਮੌਕੇ ਯੂਨੀਵਰਸਿਟੀ ਦੇ ਸਟਾਫ, ਵਿਦਿਆਰਥੀਆਂ ਅਤੇ ਸਾਬਕਾ ਪ੍ਰਸ਼ਾਸਨਿਕ ਅਧਿਕਾਰੀਆਂ ਦਾ ਧੰਨਵਾਦ ਕਰਦਿਆਂ, ਇਸ ਮਾਣਜੋਗ ਸਫਲਤਾ ਲਈ ਸਭ ਨੂੰ ਵਧਾਈ ਦਿੱਤੀ। ਉਨ੍ਹਾਂ ਇਹ ਵੀ ਕਿਹਾ ਕਿ ਇਹ ਸਿਰਫ ਇੱਕ ਮਾਣ ਨਹੀਂ, ਸਗੋਂ ਇੱਕ ਜ਼ਿੰਮੇਵਾਰੀ ਹੈ ਜੋ ਸਿੱਖਿਆ ਦੇ ਮਿਆਰ ਨੂੰ ਹੋਰ ਉੱਚਾ ਚੁੱਕਣ ਲਈ ਪ੍ਰੇਰਨਾ ਦਿੰਦੀ ਹੈ।
ਰੈਂਕਿੰਗ ਲਈ ਯੂਨੀਵਰਸਿਟੀ ਨੇ ਵੱਖ-ਵੱਖ ਮਾਪਦੰਡਾਂ 'ਚ ਉੱਤਮ ਪ੍ਰਦਰਸ਼ਨ ਕੀਤਾ। 'ਅਕੈਡਮਿਕ ਅਤੇ ਰਿਸਰਚ ਐਕਸੀਲੈਂਸ', 'ਇੰਡਸਟਰੀ ਇੰਟਰਫੇਸ', 'ਇਨਫਰਾਸਟ੍ਰਕਚਰ', 'ਗਵਰਨੈਂਸ' ਅਤੇ 'ਡਾਇਵਰਸਟੀ' ਵਰਗੀਆਂ ਸ਼੍ਰੇਣੀਆਂ 'ਚ ਬੇਹਤਰੀਨ ਅੰਕ ਹਾਸਿਲ ਕਰਦਿਆਂ ਕੁੱਲ 822.32 ਅੰਕ ਪ੍ਰਾਪਤ ਕੀਤੇ।
ਇਸ ਮੌਕੇ ਡੀਨ ਅਕਾਦਮਿਕ ਪ੍ਰੋ. ਜਸਵਿੰਦਰ ਸਿੰਘ ਬਰਾੜ ਅਤੇ ਰਜਿਸਟਰਾਰ ਪ੍ਰੋ. ਦਵਿੰਦਰਪਾਲ ਸਿੱਧੂ ਨੇ ਵੀ ਖੁਸ਼ੀ ਜਤਾਈ ਅਤੇ ਇਸ ਮਿਹਨਤ ਨੂੰ ਯੂਨੀਵਰਸਿਟੀ ਦੇ ਸਾਰੇ ਸਹਿਯੋਗੀਆਂ ਦੀ ਸਾਂਝੀ ਕਾਮਯਾਬੀ ਕਰਾਰ ਦਿੱਤਾ।
Powered by Froala Editor
