ਧੜੱਲੇਦਾਰ ਬਿਊਰੋ

ਧਰਮਹੇੜੀ ਨੇੜੇ ਮੀਰਾਪੁਰ ਚੋਅ ਦੀ ਸਫਾਈ, ਸਥਿਤੀ ਕੰਟਰੋਲ ਵਿੱਚ: ਐਸ.ਡੀ.ਐਮ. ਹਰਜੋਤ ਕੌਰ ਮਾਵੀ

ਪਟਿਆਲਾ, 5 ਸਤੰਬਰ 2025 :

ਐਸ.ਡੀ.ਐਮ. ਪਟਿਆਲਾ ਹਰਜੋਤ ਕੌਰ ਮਾਵੀ ਨੇ ਦੱਸਿਆ ਕਿ ਪਿੰਡ ਧਰਮਹੇੜੀ ਨੇੜੇ ਘੱਗਰ ਨਦੀ ਦਾ ਪਾਣੀ ਅਜੇ ਤਕ ਆਪਣੇ ਰਸਤੇ ਵਿੱਚ ਹੀ ਵਹਿ ਰਿਹਾ ਹੈ। ਨਾ ਤਾਂ ਕੋਈ ਪਾੜ ਪਿਆ ਹੈ, ਨਾ ਹੀ ਪਾਣੀ ਨਦੀ ਦੇ ਕਿਨਾਰੇ ਤੋਂ ਉਪਰ ਲੰਘਿਆ ਹੈ। ਉਨ੍ਹਾਂ ਦੱਸਿਆ ਕਿ ਇਲਾਕੇ 'ਚ ਹੜ੍ਹ ਤੋਂ ਬਚਾਅ ਲਈ ਮੀਰਾਪੁਰ ਚੋਅ ਦੀ ਸਫਾਈ ਕੀਤੀ ਗਈ ਹੈ ਜਿਸ ਵਿੱਚ ਮਨਰੇਗਾ ਲੇਬਰ ਅਤੇ ਡਰੇਨੇਜ ਵਿਭਾਗ ਵੱਲੋਂ ਪੋਕਲੇਨ ਮਸ਼ੀਨ ਦੀ ਮਦਦ ਨਾਲ ਕੰਮ ਕੀਤਾ ਗਿਆ। ਇਨ੍ਹਾਂ ਕਾਰਜਾਂ ਲਈ 2000 ਸੈਂਡਬੈਗ ਵੀ ਉਪਲਬਧ ਕਰਵਾਏ ਗਏ ਹਨ। 1 ਸਤੰਬਰ ਨੂੰ ਡਿਪਟੀ ਕਮਿਸ਼ਨਰ ਡਾ. ਪ੍ਰੀਤੀ ਯਾਦਵ, ਹਲਕਾ ਵਿਧਾਇਕ ਚੇਤਨ ਸਿੰਘ ਜੌੜਾਮਾਜਰਾ ਅਤੇ ਸਮਾਣਾ ਮਾਰਕੀਟ ਕਮੇਟੀ ਦੇ ਚੇਅਰਮੈਨ ਬਲਕਾਰ ਸਿੰਘ ਗੱਜੂਮਾਜਰਾ ਨੇ ਵੀ ਇਲਾਕਾ ਵਿਖੇ ਦੌਰਾ ਕਰਕੇ ਸਥਿਤੀ ਦਾ ਜਾਇਜ਼ਾ ਲਿਆ ਅਤੇ ਅਧਿਕਾਰੀਆਂ ਨੂੰ ਲੋੜੀਂਦੇ ਨਿਰਦੇਸ਼ ਦਿੱਤੇ। ਐਸ.ਡੀ.ਐਮ. ਮਾਵੀ ਨੇ ਦੱਸਿਆ ਕਿ ਡਰੇਨਾ ਅਤੇ ਘੱਗਰ ਦਰਿਆ ਦੀ ਨਿਗਰਾਨੀ ਜਲ ਸਰੋਤ ਵਿਭਾਗ ਵੱਲੋਂ ਨਿਰੰਤਰ ਕੀਤੀ ਜਾ ਰਹੀ ਹੈ ਅਤੇ ਵਿਭਾਗ ਦੇ ਐਸ.ਡੀ.ਓ. ਅਤੇ ਜੇ.ਈ. ਵੀ ਮੌਕੇ 'ਤੇ ਤਾਇਨਾਤ ਹਨ। ਉਹਨਾਂ ਖੁਦ ਵੀ ਇਲਾਕੇ ਦਾ ਦੋ ਵਾਰ ਦੌਰਾ ਕਰ ਚੁੱਕੀਆਂ ਹਨ। ਸਥਾਨਕ ਲੋਕਾਂ ਦੀ ਸੁਰੱਖਿਆ ਲਈ ਨਵਾਂ ਗਾਉਂ ਅਤੇ ਕਰਹਾਲੀ ਸਾਹਿਬ ਵਿਖੇ ਦੋ ਰਾਹਤ ਕੇਂਦਰ ਸਥਾਪਤ ਕੀਤੇ ਗਏ ਹਨ, ਜਿਥੇ ਕਿਸੇ ਵੀ ਹੰਗਾਮੀ ਹਾਲਤ ਵਿੱਚ ਲੋਕਾਂ ਨੂੰ ਰੱਖਿਆ ਜਾ ਸਕੇ। ਨਾਲ ਹੀ ਮੋਟਰ ਕਿਸ਼ਤੀ ਵੀ ਤਿਆਰ ਰੱਖੀ ਗਈ ਹੈ। ਐਸ.ਡੀ.ਐਮ. ਮਾਵੀ ਨੇ ਕਿਹਾ ਕਿ ਪ੍ਰਸ਼ਾਸਨ ਹਰ ਪੱਖੋਂ ਤਿਆਰ ਹੈ ਅਤੇ ਲੋਕਾਂ ਨੂੰ ਘਬਰਾਉਣ ਦੀ ਲੋੜ ਨਹੀਂ।

Powered by Froala Editor