ਪਟਿਆਲਾ, 10 ਜੁਲਾਈ: ਸਦਭਾਵਨਾ ਮੈਡੀਕਲ ਐਂਡ ਹਾਰਟ ਇੰਸਟੀਚਿਊਟ, ਪਟਿਆਲਾ ਦੀ ਆਈ.ਵੀ.ਐਫ਼ ਅਤੇ ਬਾਂਝਪਨ ਰੋਗ ਦੇ ਮਾਹਰ ਡਾ. ਮੋਨਿਕਾ ਵਰਮਾ ਨੇ ਯੂਰਪੀਅਨ ਸੋਸਾਇਟੀ ਆਫ਼ ਹਿਊਮਨ ਰੀਪ੍ਰੋਡਕਸ਼ਨ ਐਂਡ ਐਂਬ੍ਰਾਇਓਲੋਜੀ ਵੱਲੋਂ ਲੰਡਨ ਵਿੱਚ ਆਯੋਜਿਤ 42ਵੀਂ ਸਾਲਾਨਾ ਕਾਨਫਰੰਸ ਦੌਰਾਨ ਆਈ.ਵੀ.ਐਫ਼ ਖੇਤਰ ਵਿੱਚ ਆਪਣੀ ਮਹੱਤਵਪੂਰਨ ਕਲੀਨਿਕਲ ਖੋਜ ਪੇਸ਼ ਕਰਕੇ ਪਟਿਆਲਾ ਅਤੇ ਪੰਜਾਬ ਦਾ ਨਾਮ ਅੰਤਰਰਾਸ਼ਟਰੀ ਪੱਧਰ 'ਤੇ ਰੌਸ਼ਨ ਕੀਤਾ ਹੈ। ਡਾ. ਮੋਨਿਕਾ ਵਰਮਾ ਦੀ ਇਸ ਖੋਜ ਦਾ ਕੇਂਦਰ ਪਹਿਲੇ ਆਈ.ਵੀ.ਐਫ਼ ਚੱਕਰ ਦੀ ਸਫਲਤਾ ਦਰ ਵਿੱਚ ਵਾਧਾ ਕਰਨਾ ਸੀ, ਜਿਸ ਨਾਲ ਬਾਂਝਪਨ ਨਾਲ ਜੂਝ ਰਹੇ ਜੋੜਿਆਂ ਵਿੱਚ ਗਰਭਧਾਰਣ ਦੀ ਸੰਭਾਵਨਾ ਹੋਰ ਬਿਹਤਰ ਬਣ ਸਕੇ। ਅਧਿਐਨ ਦੌਰਾਨ ਇਹ ਮਹੱਤਵਪੂਰਨ ਤੱਥ ਸਾਹਮਣੇ ਆਇਆ ਕਿ ਭਾਵੇਂ ਅਲਟਰਾਸਾਊਂਡ ਅਤੇ ਹੋਰ ਰੁਟੀਨ ਜਾਂਚਾਂ ਵਿੱਚ ਬੱਚੇਦਾਨੀ ਸਧਾਰਣ ਦਿਖਾਈ ਦਿੰਦੀ ਹੋਵੇ, ਫਿਰ ਵੀ ਹਿਸਟੇਰੋਸਕੋਪੀ ਤੋਂ ਬਾਅਦ ਕੀਤੀਆਂ ਗਈਆਂ ਅਧੁਨਿਕ ਜਾਂਚਾਂ ਰਾਹੀਂ ਲਗਭਗ 20 ਫੀਸਦੀ ਮਰੀਜ਼ਾਂ ਵਿੱਚ ਬੱਚੇਦਾਨੀ ਦੀ ਅੰਦਰੂਨੀ ਪਰਤ ਵਿੱਚ ਲੰਬੇ ਸਮੇਂ ਤੋਂ ਮੌਜੂਦ ਸੰਕਰਮਣ (ਕ੍ਰੋਨਿਕ ਐਂਡੋਮੀਟ੍ਰਾਈਟਿਸ) ਦੀ ਪਛਾਣ ਹੋਈ। ਪਹਿਲੇ ਆਈ.ਵੀ.ਐਫ਼ ਚੱਕਰ ਤੋਂ ਪਹਿਲਾਂ ਇਸ ਦਾ ਇਲਾਜ ਕਰਨ ਨਾਲ ਆਈ.ਵੀ.ਐਫ਼ ਦੀ ਸਫਲਤਾ ਅਤੇ ਗਰਭਧਾਰਣ ਦੀ ਸੰਭਾਵਨਾ ਵਿੱਚ ਮਹੱਤਵਪੂਰਨ ਵਾਧਾ ਦਰਜ ਕੀਤਾ ਗਿਆ। ਇਸ ਅਗਾਂਹਵਧੂ ਖੋਜ ਨੂੰ ਆਈ.ਵੀ.ਐਫ਼ ਇਲਾਜ ਦੀ ਸਫਲਤਾ ਦਰ ਵਿੱਚ ਸੁਧਾਰ ਲਿਆਉਣ ਅਤੇ ਮਰੀਜ਼ਾਂ ਨੂੰ ਹੋਰ ਬਿਹਤਰ ਸਿਹਤ ਸੇਵਾਵਾਂ ਪ੍ਰਦਾਨ ਕਰਨ ਦੀ ਸੰਭਾਵਨਾ ਕਾਰਨ ਅੰਤਰਰਾਸ਼ਟਰੀ ਪੱਧਰ 'ਤੇ ਵਿਸ਼ੇਸ਼ ਸਰਾਹਨਾ ਮਿਲੀ। ਡਾ. ਮੋਨਿਕਾ ਵਰਮਾ ਨੂੰ ਇਹ ਵਿਲੱਖਣ ਮਾਣ ਵੀ ਪ੍ਰਾਪਤ ਹੈ ਕਿ ਉਹ ਪਿਛਲੇ ਲਗਾਤਾਰ ਅੱਠ ਸਾਲਾਂ ਤੋਂ ਈ.ਐਸ.ਐਚ.ਆਰ.ਈ. ਦੀਆਂ ਸਾਲਾਨਾ ਕਾਨਫਰੰਸਾਂ ਵਿੱਚ ਆਪਣੀ ਖੋਜ ਪੇਸ਼ ਕਰ ਰਹੇ ਹਨ। ਉਨ੍ਹਾਂ ਨੇ ਇਸ ਉਪਲਬਧੀ ਦਾ ਸਿਹਰਾ ਆਪਣੀ ਸਮੁੱਚੀ ਟੀਮ ਦੀ ਮਿਹਨਤ ਅਤੇ ਸਮਰਪਣ ਨੂੰ ਦਿੰਦਿਆਂ ਖ਼ਾਸ ਤੌਰ 'ਤੇ ਪ੍ਰਸਿੱਧ ਐਂਬ੍ਰਾਇਓਲੋਜਿਸਟ ਡਾ. ਸਰਬਪ੍ਰੀਤ ਸਿੰਘ ਦੇ ਯੋਗਦਾਨ ਦੀ ਸ਼ਲਾਘਾ ਕੀਤੀ, ਜਿਨ੍ਹਾਂ ਨੇ ਗੁਣਵੱਤਾ ਅਤੇ ਮਰੀਜ਼ਾਂ ਦੀ ਦੇਖਭਾਲ ਦੇ ਅੰਤਰਰਾਸ਼ਟਰੀ ਮਾਪਦੰਡਾਂ ਨੂੰ ਕਾਇਮ ਰੱਖਣ ਵਿੱਚ ਅਹਿਮ ਭੂਮਿਕਾ ਨਿਭਾਈ ਹੈ। ਉਨ੍ਹਾਂ ਕਿਹਾ ਕਿ ਮਰੀਜ਼ਾਂ ਵੱਲੋਂ ਕੀਤਾ ਗਿਆ ਭਰੋਸਾ ਹੀ ਉਨ੍ਹਾਂ ਦੀ ਸਭ ਤੋਂ ਵੱਡੀ ਪ੍ਰੇਰਣਾ ਹੈ। ਡਾ. ਮੋਨਿਕਾ ਵਰਮਾ ਅਤੇ ਡਾ. ਸਰਬਪ੍ਰੀਤ ਸਿੰਘ ਸਾਂਝੇ ਤੌਰ 'ਤੇ ਸਦਭਾਵਨਾ ਆਈ.ਵੀ.ਐਫ਼ ਸਕੂਲ ਅਤੇ ਫਰਟਿਲਿਸ ਅਕੈਡਮੀ ਦਾ ਸੰਚਾਲਨ ਵੀ ਕਰ ਰਹੇ ਹਨ, ਜੋ ਦੇਸ਼ ਅਤੇ ਵਿਦੇਸ਼ ਦੇ ਵਿਦਿਆਰਥੀਆਂ ਲਈ ਆਈਵੀਐਫ਼ ਖੇਤਰ ਵਿੱਚ ਅਕਾਦਮਿਕ ਸਿੱਖਿਆ ਅਤੇ ਪ੍ਰਸ਼ਿਕਸ਼ਣ ਦਾ ਇੱਕ ਪ੍ਰਮੁੱਖ ਕੇਂਦਰ ਹੈ।

Ivf Conference In London