September 4, 2025 11:22:47

S M Singh / Patiala

Reporter..S M Singh

ਭਾਸ਼ਾ ਵਿਭਾਗ ਪੰਜਾਬ ਵੱਲੋਂ ਸਾਲ 2025 ਦੇ ਸਰਵੋਤਮ ਪੰਜਾਬੀ ਪੁਸਤਕ ਪੁਰਸਕਾਰਾਂ ਦਾ ਐਲਾਨ

ਪਟਿਆਲਾ, 04 ਸਤੰਬਰ 2025 :

ਪੰਜਾਬ ਸਰਕਾਰ ਦੇ ਭਾਸ਼ਾ ਵਿਭਾਗ ਵੱਲੋਂ ਸਾਲ 2025 ਲਈ ਸਰਵੋਤਮ ਪੰਜਾਬੀ ਪੁਸਤਕ ਪੁਰਸਕਾਰਾਂ ਦਾ ਐਲਾਨ ਕਰ ਦਿੱਤਾ ਗਿਆ ਹੈ। ਡਾਇਰੈਕਟਰ ਸ. ਜਸਵੰਤ ਸਿੰਘ ਜ਼ਫ਼ਰ ਮੁਤਾਬਕ ਇਹ ਪੁਰਸਕਾਰ ਨਵੰਬਰ 2025 ਦੇ ਪਹਿਲੇ ਹਫ਼ਤੇ ਪਟਿਆਲਾ ਵਿਖੇ ‘ਭਾਸ਼ਾ ਭਵਨ’ ਵਿੱਚ ਪੰਜਾਬੀ ਮਾਹ ਦੇ ਰਾਜ ਪੱਧਰੀ ਸਮਾਗਮ ਦੌਰਾਨ ਦਿੱਤੇ ਜਾਣਗੇ। ਇਨ੍ਹਾਂ ਲਈ ਸਾਲ 2024 ਵਿੱਚ ਛਪੀਆਂ ਪੁਸਤਕਾਂ ਵਿੱਚੋਂ 273 ਕਿਤਾਬਾਂ ਪ੍ਰਾਪਤ ਹੋਈਆਂ, ਜਿਨ੍ਹਾਂ ਦਾ ਮੁਲਾਂਕਣ ਵਿਦਵਾਨ ਵਿਸ਼ਾ ਮਾਹਿਰਾਂ ਦੁਆਰਾ ਕਰਵਾਇਆ ਗਿਆ ਅਤੇ 10 ਸਰਵੋਤਮ ਪੁਸਤਕਾਂ ਦੀ ਚੋਣ ਕੀਤੀ ਗਈ। ਹਰ ਪੁਰਸਕਾਰ ਵਿੱਚ ₹31,000 ਨਕਦ ਰਾਸ਼ੀ, ਦੋਸ਼ਾਲਾ ਅਤੇ ਸਨਮਾਨ ਚਿੰਨ੍ਹ ਦਿੱਤਾ ਜਾਵੇਗਾ। ਚੁਣੀ ਗਈਆਂ ਪੁਸਤਕਾਂ ਵਿੱਚ ਗੁਰਿੰਦਰਜੀਤ ਦੀ ਬਰਫ਼ 'ਚ ਉੱਗੇ ਅਮਲਤਾਸ (ਭਾਈ ਵੀਰ ਸਿੰਘ ਪੁਰਸਕਾਰ), ਜਸਵੀਰ ਸਿੰਘ ਰਾਣਾ ਦੀ 70% ਪ੍ਰੇਮ ਕਥਾ (ਨਾਨਕ ਸਿੰਘ ਪੁਰਸਕਾਰ), ਭਗਵੰਤ ਰਸੂਲਪੁਰੀ ਦੀ ਡਿਲਿਵਰੀ ਮੈਨ (ਪ੍ਰਿੰਸ ਸੁਜਾਨ ਸਿੰਘ ਪੁਰਸਕਾਰ), ਡਾ. ਪਰਮਜੀਤ ਢੀਂਗਰਾ ਦੀ ਕਿਤਾਬ ਜੋ ਅਜੇ ਬਾਕੀ ਹੈ (ਗੁਰਬਖ਼ਸ਼ ਸਿੰਘ ਪ੍ਰੀਤਲੜੀ ਪੁਰਸਕਾਰ), ਸ਼ਮੀਲ ਦੀ ਤੇਗ (ਗਿਆਨੀ ਗੁਰਮੁਖ ਸਿੰਘ ਮੁਸਾਫ਼ਿਰ ਪੁਰਸਕਾਰ), ਸੁਭਾਸ਼ ਭਾਸਕਰ ਦੀ ਅਣਵੰਡਿਆ ਪੰਜਾਬ (ਅਨੁਵਾਦ – ਡਾ. ਚੰਦਰ ਤ੍ਰਿਖਾ, ਪ੍ਰੋ. ਗੁਰਦਿਆਲ ਸਿੰਘ ਪੁਰਸਕਾਰ), ਅਮੀਆ ਕੁੰਵਰ ਦੀ ਇਮਰੋਜ਼ਨਾਮਾ (ਐੱਮ.ਐੱਸ. ਰੰਧਾਵਾ ਪੁਰਸਕਾਰ), ਡਾ. ਇੰਦਰਪ੍ਰੀਤ ਸਿੰਘ ਧਾਮੀ ਦੀ ਸੁਪਨਸਾਜ਼ (ਸ੍ਰੀ ਗੁਰੂ ਹਰਿਕ੍ਰਿਸ਼ਨ ਪੁਰਸਕਾਰ), ਗੁਰਦੀਪ ਸਿੰਘ ਦੀ ਇਹ ਦੇਸ ਪੰਜਾਬ ਦੀ ਸਮਝ ਨਾਹੀਂ (ਡਾ. ਅਤਰ ਸਿੰਘ ਪੁਰਸਕਾਰ) ਅਤੇ ਜਗਤਾਰ ਸਿੰਘ ਸੋਖੀ ਦੀ ਪੰਜਾਬੀ ਸਮਾਨਾਰਥਕ ਕੋਸ਼ (ਭਾਈ ਕਾਨ੍ਹ ਸਿੰਘ ਨਾਭਾ ਪੁਰਸਕਾਰ) ਸ਼ਾਮਿਲ ਹਨ। ਸ. ਜ਼ਫ਼ਰ ਨੇ ਦੱਸਿਆ ਕਿ ਹਿੰਦੀ, ਉਰਦੂ ਅਤੇ ਸੰਸਕ੍ਰਿਤ ਭਾਸ਼ਾਵਾਂ ਦੇ ਪੁਰਸਕਾਰਾਂ ਦਾ ਐਲਾਨ ਵੀ ਜਲਦ ਕੀਤਾ ਜਾਵੇਗਾ। ਉਨ੍ਹਾਂ ਸਾਰੇ ਜੇਤੂਆਂ ਨੂੰ ਵਧਾਈਆਂ ਦਿੱਤੀਆਂ ਅਤੇ ਪੰਜਾਬੀ ਭਾਸ਼ਾ ਦੇ ਪ੍ਰਚਾਰ ਲਈ ਨਿਰੰਤਰ ਯਤਨ ਕਰਦੇ ਰਹਿਣ ਦੀ ਅਪੀਲ ਵੀ ਕੀਤੀ।

2025