ਧੜੱਲੇਦਾਰ ਬਿਊਰੋ

ਘਨੌਰ ਇਲਾਕੇ 'ਚ ਘੱਗਰ ਦਾ ਪਾਣੀ ਉਤਰਿਆ, ਦੇਵੀਗੜ੍ਹ ਨੇੜੇ ਟਾਂਗਰੀ ਨਦੀ ਖ਼ਤਰੇ ਦੇ ਨਿਸ਼ਾਨ ਤੋਂ ਉੱਪਰ

ਪਟਿਆਲਾ, 9 ਸਤੰਬਰ 2025 :

ਪਟਿਆਲਾ ਦੇ ਡਿਪਟੀ ਕਮਿਸ਼ਨਰ ਡਾ. ਪ੍ਰੀਤੀ ਯਾਦਵ ਨੇ ਜਾਣਕਾਰੀ ਦਿੱਤੀ ਕਿ ਘਨੌਰ ਨੇੜੇ ਘੱਗਰ ਦਰਿਆ ਦਾ ਪਾਣੀ ਹੇਠਾਂ ਉਤਰ ਗਿਆ ਹੈ ਅਤੇ ਸਰਾਲਾ ਹੈਡ 'ਤੇ ਪਾਣੀ ਹੁਣ ਖ਼ਤਰੇ ਦੇ ਨਿਸ਼ਾਨ ਤੋਂ ਥੱਲੇ ਵਹਿ ਰਿਹਾ ਹੈ। ਹਾਲਾਂਕਿ ਟਾਂਗਰੀ ਅਤੇ ਮਾਰਕੰਡਾ ਨਦੀਆਂ ਅਜੇ ਵੀ ਖ਼ਤਰੇ ਤੋਂ ਢਾਈ ਫੁੱਟ ਉਪਰ ਹਨ। ਸ਼ੁਤਰਾਣਾ ਹਲਕੇ ਵਿੱਚ ਘੱਗਰ ਦਾ ਪਾਣੀ ਉੱਚੇ ਪੱਧਰ 'ਤੇ ਹੋਣ ਕਰਕੇ ਪ੍ਰਸ਼ਾਸਨ ਨੇ ਡਰੇਨੇਜ ਵਿਭਾਗ, ਫੌਜ ਅਤੇ ਸਥਾਨਕ ਲੋਕਾਂ ਦੀ ਮਦਦ ਨਾਲ ਬੰਨ੍ਹ ਮਜ਼ਬੂਤ ਕਰਨ ਦੀ ਕਾਰਵਾਈ ਤੀਬਰ ਕਰ ਦਿੱਤੀ ਹੈ। ਉਨ੍ਹਾਂ ਦੱਸਿਆ ਕਿ 29 ਅਗਸਤ ਤੋਂ ਲਗਾਤਾਰ ਟੀਮਾਂ ਕੰਮ 'ਚ ਲੱਗੀਆਂ ਹਨ ਅਤੇ ਘੱਗਰ ਜਾਂ ਟਾਂਗਰੀ 'ਚ ਹਾਲੇ ਤੱਕ ਕੋਈ ਪਾੜ ਨਹੀਂ ਪਿਆ। ਮਾਰਕੰਡਾ ਨਾਲ ਜੁੜੀ ਸਾਗਰਾਪਾੜਾ ਡਰੇਨ 'ਚ ਪਾੜ ਆ ਗਿਆ ਸੀ, ਜਿਸਨੂੰ ਤੁਰੰਤ ਪੂਰਾ ਕਰ ਲਿਆ ਗਿਆ। ਪਿੰਡ ਬੁੱਧਮੋਰ, ਸਾਦਿਕਪੁਰ, ਮਹਿਮੂਦਪੁਰ ਆਦਿ ਦੇ ਵਸਨੀਕਾਂ ਨੂੰ ਸਾਵਧਾਨ ਰਹਿਣ ਦੀ ਸਲਾਹ ਦਿੱਤੀ ਗਈ ਹੈ। ਇਸਦੇ ਨਾਲ ਹੀ ਪਾਣੀ ਤੋਂ ਪ੍ਰਭਾਵਿਤ ਇਲਾਕਿਆਂ ਵਿੱਚ ਜਲ ਸਪਲਾਈ, ਸੈਨੀਟੇਸ਼ਨ ਅਤੇ ਪਸ਼ੂ ਚਾਰੇ ਦੀ ਸਹੂਲਤ ਯਕੀਨੀ ਬਣਾਈ ਜਾ ਰਹੀ ਹੈ। ਜ਼ਿਲ੍ਹੇ ਦੇ ਵੱਖ-ਵੱਖ ਐਸ.ਡੀ.ਐਮ ਅਤੇ ਵਿਧਾਇਕ ਵੀ ਮੌਕੇ 'ਤੇ ਜਾ ਕੇ ਨਿਗਰਾਨੀ ਕਰ ਰਹੇ ਹਨ। ਡਿਪਟੀ ਕਮਿਸ਼ਨਰ ਨੇ ਨਦੀਆਂ ਦੇ ਨੇੜਲੇ ਲੋਕਾਂ ਨੂੰ ਭਰੋਸਾ ਦਿਵਾਇਆ ਕਿ ਪ੍ਰਸ਼ਾਸਨ ਪੂਰੀ ਤਰ੍ਹਾਂ ਚੋਖਾ ਤੇ ਮੁਸਤੈਦ ਹੈ।

Powered by Froala Editor