ਧੜੱਲੇਦਾਰ ਬਿਊਰੋ ਮੌੜ ਕਲਾਂ ਵਿੱਚ ਚਿੱਟੇ ਦੀ ਖੁੱਲੀ ਵਿੱਕਰੀ ‘ਤੇ ਹਾਈਕੋਰਟ ਸਖਤ ਬਠਿੰਡਾ, 3 ਦਸੰਬਰ 2025 : ਪੰਜਾਬ ਅਤੇ ਹਰਿਆਣਾ ਹਾਈਕੋਰਟ ਨੇ ਬਠਿੰਡਾ ਦੇ ਮੌੜ ਕਲਾਂ ਪਿੰਡ ਵਿੱਚ ਚਿੱਟੇ ਦੀ ਖੁੱਲੀ ਵਿੱਕਰੀ ਨੂੰ ਗੰਭੀਰਤਾ ਨਾਲ ਲੈਂਦਿਆਂ ਰਾਜ ਸਰਕਾਰ ਤੋਂ ਵਿਸਥਾਰ ਵਿੱਚ ਜਵਾਬ ਮੰਗਿਆ ਹੈ। ਪਿੰਡ ਵਾਸੀਆਂ ਨੇ ਨਸ਼ੇ ਦੇ ਵਧ ਰਹੇ ਦਹਿਸ਼ਤ ਭਰੇ ਹਾਲਾਤਾਂ ਕਾਰਨ ਕੰਧਾਂ ‘ਤੇ “ਇੱਥੇ ਚਿੱਟਾ ਵਿਕਦਾ ਹੈ” ਲਿਖ ਕੇ ਵਿਰੋਧ ਕੀਤਾ ਸੀ, ਜਿਸ ਨੂੰ ਪੁਲਿਸ ਨੇ ਬਾਅਦ ‘ਚ ਮਿਟਾ ਦਿੱਤਾ। ਅਦਾਲਤ ਨੇ ਪੁੱਛਿਆ ਹੈ ਕਿ ਨਸ਼ੇ ਨੂੰ ਰੋਕਣ ਲਈ ਕੀ ਕਦਮ ਚੁੱਕੇ ਗਏ, ਸ਼ੱਕੀ ਓਵਰਡੋਜ਼ ਮੌਤਾਂ ’ਤੇ ਕੀ ਕਾਰਵਾਈ ਹੋਈ ਅਤੇ ਇਸ ਤਰ੍ਹਾਂ ਦੀ ਸਥਿਤੀ ਨੂੰ ਭਵਿੱਖ ਵਿੱਚ ਕਿਵੇਂ ਰੋਕਿਆ ਜਾਵੇਗਾ। ਪਿੰਡ ਦੀਆਂ ਔਰਤਾਂ ਨੇ ਦੋਸ਼ ਲਾਇਆ ਕਿ ਨਸ਼ਾ ਇਤਨਾ ਫੈਲ ਗਿਆ ਹੈ ਕਿ ਕਈ ਘਰ ਤਬਾਹ ਹੋ ਰਹੇ ਹਨ ਅਤੇ ਜਵਾਨ ਆਪਣੀ ਜਾਨ ਗਵਾ ਰਹੇ ਹਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਤਸਕਰਾਂ ਨੂੰ ਪੁਲਿਸ ਦੀ ਕਥਿਤ ਸਹਾਇਤਾ ਮਿਲਦੀ ਹੈ, ਜਿਸ ਕਾਰਨ ਨਸ਼ੇ ਦੀ ਲੜੀ ਟੁੱਟ ਨਹੀਂ ਰਹੀ। ਹਾਲਾਂਕਿ ਪੁਲਿਸ ਦਾ ਦਾਅਵਾ ਹੈ ਕਿ ਉਹ ਕਾਰਵਾਈ ਕਰ ਰਹੀ ਹੈ ਅਤੇ ਮੌੜ ਕਲਾਂ ਵਿੱਚ ਕਈ ਤਸਕਰ ਫੜੇ ਹਨ, ਪਰ ਪਿੰਡ ਵਾਸੀਆਂ ਅਨੁਸਾਰ ਹਾਲਾਤ ਫਿਰ ਵੀ ਕਾਬੂ ਤੋਂ ਬਾਹਰ ਹਨ।