February 26, 2026 09:12:05

S M Singh / Bathinda

ਆਂਗਣਵਾੜੀ ਮੁਲਾਜ਼ਮ ਯੂਨੀਅਨ ਪੰਜਾਬ (ਸੀਟੂ) ਨੇ ਦੋਸ਼ ਲਗਾਇਆ ਹੈ ਕਿ ਚਾਰ ਸਾਲਾਂ ਵਿੱਚ ਸਰਕਾਰ ਵੱਲੋਂ ਕੀਤੇ ਵਾਅਦੇ ਪੂਰੇ ਨਹੀਂ ਹੋਏ ਅਤੇ ਮਾਣਭੱਤਾ ਵਧਾਉਣ ਸਮੇਤ ਕਈ ਮੰਗਾਂ ਅਜੇ ਵੀ ਅਧੂਰੀਆਂ ਹਨ। ਆਗੂਆਂ ਪ੍ਰਕਾਸ਼ ਕੌਰ ਸੋਹੀ ਅਤੇ ਪ੍ਰਤਿਭਾ ਸ਼ਰਮਾ ਨੇ ਕਿਹਾ ਕਿ ਫੇਸ ਰਿਕੋਗਨਾਈਜੇਸ਼ਨ ਸਿਸਟਮ ਲਈ ਸਰਕਾਰ ਵੱਲੋਂ ਮੋਬਾਇਲ ਦੇਣੇ ਸਨ, ਪਰ ਅਜੇ ਤੱਕ ਉਪਕਰਣ ਨਹੀਂ ਮਿਲੇ ਅਤੇ ਵਰਕਰ ਆਪਣੇ ਫੋਨਾਂ ਨਾਲ ਕੰਮ ਕਰਨ ਲਈ ਮਜਬੂਰ ਹਨ। ਅਜਨਾਲਾ ਦੀ ਇਕ ਵਰਕਰ ਦੀ ਸੇਵਾ ਸਮਾਪਤ ਕਰਨ ਨੂੰ ਉਨ੍ਹਾਂ ਨੇ ਨਾਜਾਇਜ਼ ਕਰਾਰ ਦਿੱਤਾ ਹੈ। ਜੱਥੇਬੰਦੀ ਨੇ ਜਸਵਿੰਦਰ ਕੌਰ ਦੀ ਤੁਰੰਤ ਬਹਾਲੀ, ਭਰਤੀ ਨਿਯਮਾਂ ਵਿੱਚ ਕੀਤੀਆਂ ਤਬਦੀਲੀਆਂ ਵਾਪਸ ਲੈਣ ਅਤੇ ਪੋਸ਼ਣ ਆਹਾਰ ਵਿੱਚ ਸੁਧਾਰ ਦੀ ਮੰਗ ਕੀਤੀ ਹੈ। ਇਨ੍ਹਾਂ ਮੁੱਦਿਆਂ ਨੂੰ ਲੈ ਕੇ 1 ਮਾਰਚ 2026 ਨੂੰ ਮਲੋਟ ਵਿੱਚ ਵਿਭਾਗੀ ਮੰਤਰੀ ਦੇ ਘਰਾਓ ਦਾ ਐਲਾਨ ਕੀਤਾ ਗਿਆ ਹੈ।