ਬਠਿੰਡਾ ਵਿੱਚ ਪਰਲਜ ਕੰਪਨੀ ਦੀ ਸੁੰਨੀ ਪਈ ਇਮਾਰਤ ਅੰਦਰ ਪੁਲਿਸ ਤੇ ਬਦਮਾਸ਼ਾਂ ਦਰਮਿਆਨ ਤੜਕਿਆਂ ਮੁਕਾਬਲਾ ਹੋਇਆ, ਜਿਸ ਦੌਰਾਨ ਪੰਜ ਲੋਕਾਂ ਨੂੰ ਕਾਬੂ ਕਰ ਲਿਆ ਗਿਆ। ਰੇਲਵੇ ਰੋਡ ਇਲਾਕੇ ਵਿੱਚ ਲੁੱਟ ਅਤੇ ਨਸ਼ੇ ਨਾਲ ਜੁੜੀਆਂ ਸ਼ਿਕਾਇਤਾਂ ਮਿਲਣ ਉਪਰੰਤ ਥਾਣਾ ਕੋਤਵਾਲੀ ਦੀ ਟੀਮ ਨੇ ਛਾਪਾ ਮਾਰਿਆ ਤਾਂ ਅੰਦਰੋਂ ਗੋਲੀਆਂ ਚਲਣ ਲੱਗ ਪਈਆਂ। ਜਵਾਬੀ ਕਾਰਵਾਈ ਵਿੱਚ ਨੀਰਜ ਉਰਫ ਕਾਲੂ ਦੀ ਲੱਤ ਵਿੱਚ ਗੋਲੀ ਲੱਗੀ ਅਤੇ ਉਸ ਨੂੰ ਤੁਰੰਤ ਗ੍ਰਿਫਤਾਰ ਕਰ ਲਿਆ ਗਿਆ। ਐਸਪੀ (ਸਿਟੀ) ਨਰਿੰਦਰ ਸਿੰਘ ਮੁਤਾਬਕ ਕਾਬੂ ਆਏ ਹੋਰ ਮੁਲਜ਼ਮਾਂ ਵਿੱਚ ਬਿਕਰਮਜੀਤ, ਕਰਨ, ਰਾਹੁਲ ਅਤੇ ਘੋਟਾ ਸ਼ਾਮਲ ਹਨ। ਨੀਰਜ ਅਤੇ ਉਸਦੇ ਭਰਾ ‘ਤੇ ਪਹਿਲਾਂ ਵੀ ਕਈ ਕੇਸ ਦਰਜ ਹਨ, ਜਦਕਿ ਕਰਨ ਤੇ ਬਿਕਰਮਜੀਤ ਖ਼ਿਲਾਫ਼ ਵੀ ਮਾਮਲੇ ਦਰਜ ਹੋਣ ਦੀ ਪੁਸ਼ਟੀ ਹੋਈ ਹੈ। ਸਾਰੇ ਦੋਸ਼ੀਆਂ ਵਿਰੁੱਧ ਬੀਐਨਐਸ ਧਾਰਾ 310(2), ਅਸਲਾ ਐਕਟ ਅਤੇ ਐਨਡੀਪੀਐਸ ਐਕਟ ਤਹਿਤ ਕਾਰਵਾਈ ਸ਼ੁਰੂ ਕਰ ਦਿੱਤੀ ਗਈ ਹੈ।