ਸੰਗਰੂਰ ਜ਼ਿਲ੍ਹੇ ਦੇ ਲੌਂਗੋਵਾਲ ਪਿੰਡ ਵਿੱਚ ਸਪੋਰਟਸ ਸਟੇਡੀਅਮ ਬਣਾਉਣ ਲਈ ਮੋਰਾਂ ਦੇ ਕੁਦਰਤੀ ਨਿਵਾਸ ਸਥਾਨ ਵਿੱਚੋਂ ਝਾੜੀਆਂ ਅਤੇ ਛੋਟੇ ਦਰਖ਼ਤਾਂ ਦੀ ਸਫ਼ਾਈ ਕੀਤੇ ਜਾਣ ਦੇ ਕਥਿਤ ਕਦਮ ਦਾ ਵਾਤਾਵਰਣ ਕਾਰਕੁਨਾਂ ਅਤੇ ਸਥਾਨਕ ਵਾਸੀਆਂ ਵੱਲੋਂ ਵਿਰੋਧ ਕੀਤਾ ਜਾ ਰਿਹਾ ਹੈ। ਪੁਲੀਸ ਥਾਣੇ ਨੇੜੇ ਸਥਿਤ ਸੱਤ ਏਕੜ ਜ਼ਮੀਨ ’ਤੇ 100 ਤੋਂ 150 ਤੋਂ ਵੱਧ ਮੋਰਾਂ ਦਾ ਨਿਵਾਸ ਹੋਣ ਦਾ ਦਾਅਵਾ ਕੀਤਾ ਗਿਆ ਹੈ। ਵਾਤਾਵਰਣ ਵਿਗਿਆਨੀ ਕਰਨਲ ਜਸਜੀਤ ਸਿੰਘ ਗਿੱਲ (ਸੇਵਾਮੁਕਤ) ਨੇ ਪੰਜਾਬ ਦੇ ਰਾਜਪਾਲ ਨੂੰ ਮੰਗ ਪੱਤਰ ਭੇਜ ਕੇ ਮਾਮਲੇ ਵਿੱਚ ਦਖ਼ਲ ਦੇਣ ਦੀ ਅਪੀਲ ਕੀਤੀ ਹੈ। ਉਨ੍ਹਾਂ ਦੋਸ਼ ਲਾਇਆ ਕਿ ਇੱਥੇ ਭਾਰੀ ਮਸ਼ੀਨਰੀ ਲਿਆ ਕੇ ਹਰਿਆਲੀ ਸਾਫ਼ ਕੀਤੀ ਜਾ ਰਹੀ ਹੈ ਅਤੇ ਇਹ ਹਾਈ ਕੋਰਟ ਦੇ ਨਿਰਦੇਸ਼ਾਂ ਦੀ ਉਲੰਘਣਾ ਹੋ ਸਕਦੀ ਹੈ। ਸਮਾਜਿਕ ਕਾਰਕੁਨ ਜਸਇੰਦਰ ਕੌਰ ਨੇ ਵੀ ਕਾਰਵਾਈ ਤੁਰੰਤ ਰੋਕਣ ਦੀ ਮੰਗ ਕੀਤੀ ਹੈ। ਉੱਧਰ, ਲੋਕ ਨਿਰਮਾਣ ਵਿਭਾਗ ਸੰਗਰੂਰ ਦੇ ਕਾਰਜਕਾਰੀ ਇੰਜੀਨੀਅਰ ਅਜੈ ਗਰਗ ਨੇ ਕਿਹਾ ਕਿ ਕੋਈ ਵੀ ਦਰਖ਼ਤ ਨਹੀਂ ਕੱਟਿਆ ਗਿਆ ਅਤੇ ਨਾ ਹੀ ਕੱਟਿਆ ਜਾਵੇਗਾ। ਉਨ੍ਹਾਂ ਮੁਤਾਬਕ ਸਰਕਾਰੀ ਜ਼ਮੀਨ ਦੀ ਚਾਰਦੀਵਾਰੀ ਕਰਨ ਲਈ ਸਿਰਫ਼ ਘੇਰੇ ਵਿੱਚੋਂ ਜੰਗਲੀ ਘਾਹ-ਫੂਸ ਹਟਾਇਆ ਜਾ ਰਿਹਾ ਹੈ, ਜਦਕਿ ਹਾਈ ਕੋਰਟ ਦੇ ਨਿਰਦੇਸ਼ਾਂ ਅਨੁਸਾਰ ਦਰਖ਼ਤ ਅਤੇ ਝਾੜੀਆਂ ਬਰਕਰਾਰ ਰਹਿਣਗੀਆਂ।

Longowal Sangrur Punjab News Peacock Habitat Environmental Protection Sports Stadium Tree Cutting Punjab Government Pwd Punjab Wildlife Conservation Jasjit Singh Gill Jasinder Kaur