Reporter..Rajni ਇੰਡੀਗੋ ਸੰਕਟ ‘ਤੇ ਹਾਈਕੋਰਟ ਭੜਕੀ ! ਨਵੀਂ ਦਿੱਲੀ, 10 ਦਸੰਬਰ 2025 : ਦਿੱਲੀ ਹਾਈਕੋਰਟ ਨੇ ਇੰਡੀਗੋ ਏਅਰਲਾਈਨ ਨਾਲ ਜੁੜੇ ਸੰਕਟ ‘ਤੇ ਕੜੀ ਨਾਰਾਜ਼ਗੀ ਜਤਾਈ ਹੈ ਅਤੇ ਕੇਂਦਰ ਸਰਕਾਰ ਤੇ ਡੀਜੀਸੀਏ ਤੋਂ ਪੁੱਛਿਆ ਹੈ ਕਿ ਹਜ਼ਾਰਾਂ ਯਾਤਰੀਆਂ ਦੇ ਫਸਣ ਤੱਕ ਮਾਮਲਾ ਕਿਵੇਂ ਬੇਕਾਬੂ ਹੋਇਆ। ਕੋਰਟ ਨੇ ਹਵਾਈ ਕਿਰਾਏ ਵਿੱਚ ਬੇਹਿਸਾਬ ਵਾਧੇ ‘ਤੇ ਹੈਰਾਨੀ ਜ਼ਾਹਰ ਕੀਤੀ ਅਤੇ ਸਵਾਲ ਕੀਤਾ ਕਿ 5 ਹਜ਼ਾਰ ਦੀ ਟਿਕਟ ਇੱਕਦਮ 35 ਹਜ਼ਾਰ ਕਿਵੇਂ ਹੋ ਗਈ। ਜੱਜਾਂ ਨੇ ਇਹ ਵਾਧਾ ਹੋਰ ਏਅਰਲਾਈਨਾਂ ਦੀ ਲੁੱਟਖਸੋਟ ਦੱਸਿਆ ਅਤੇ ਪੁੱਛਿਆ ਕਿ ਸਰਕਾਰ ਨੇ ਇਸ ਦੌਰਾਨ ਐਮਰਜੈਂਸੀ ਹਾਲਾਤਾਂ ਦਾ ਫਾਇਦਾ ਚੁੱਕਣ ਤੋਂ ਉਨ੍ਹਾਂ ਨੂੰ ਰੋਕਿਆ ਕਿਉਂ ਨਹੀਂ। ਸਰਕਾਰ ਨੇ ਦਲੀਲ ਦਿੱਤੀ ਕਿ ਹੁਣ ਕਿਰਾਏ ‘ਤੇ ਕੈਪਿੰਗ ਲੱਗ ਚੁੱਕੀ ਹੈ ਅਤੇ ਇੰਡੀਗੋ ਨੂੰ ਨੋਟਿਸ ਦੇ ਕੇ ਉਸਦੀ ਮੁਆਫ਼ੀ ਲਈ ਗਈ ਹੈ, ਪਰ ਕੋਰਟ ਨੇ ਕਿਹਾ ਕਿ ਫ਼ੈਸਲਾ ਦੇਰ ਨਾਲ ਆਇਆ ਅਤੇ ਯਾਤਰੀ ਪਹਿਲਾਂ ਹੀ ਨੁਕਸਾਨ ਝੱਲ ਚੁੱਕੇ ਹਨ। ਕੋਰਟ ਨੇ ਸਪੱਸ਼ਟ ਕੀਤਾ ਕਿ ਫਸੇ ਯਾਤਰੀਆਂ ਨੂੰ ਨਿਯਮਾਂ ਮੁਤਾਬਕ ਪੂਰਾ ਮੁਆਵਜ਼ਾ ਮਿਲੇਗਾ ਅਤੇ ਰਿਫੰਡ ਪ੍ਰਕਿਰਿਆ ਤੁਰੰਤ ਪੂਰੀ ਕੀਤੀ ਜਾਵੇ। ਪਾਇਲਟਾਂ ਦੇ ਡਿਊਟੀ ਘੰਟਿਆਂ ਅਤੇ ਸਾਫਟਵੇਅਰ ਗੜਬੜ ਨੂੰ ਸੰਕਟ ਦੀ ਵਜ੍ਹਾ ਮੰਨਿਆ ਗਿਆ ਹੈ। ਡੀਜੀਸੀਏ ਨੇ ਜਾਂਚ ਲਈ ਇੱਕ ਉੱਚ ਪੱਧਰੀ ਕਮੇਟੀ ਬਣਾਈ ਹੈ, ਜਦੋਂਕਿ ਇੰਡੀਗੋ ਦਾ ਸੰਕਟ ਨੌਵੇਂ ਦਿਨ ਵੀ ਜਾਰੀ ਹੈ।